Os Socialistas de Oroso denunciamos o abandono do Camiño Inglés por parte da Xunta e da Deputación.

Algúns tramos do Camiño Inglés están intransitables, como este ao seu paso polo veciño concello de Ordes

Algúns tramos do Camiño Inglés están intransitables, como este ao seu paso polo veciño concello de Ordes

Pese á negativa do PP de Oroso, aprobamos unha moción na que pedíamos unha maior implicación da Deputación.

A situación vivida a principios de agosto por un grupo de peregrinos, que quixo facer noite no polideportivo de Sigüeiro sen nin sequera avisar previamente e que pretendía dispoñer ao seu antollo das instalacións deportivas de todos os veciños, volveu poñer de manifesto o abandono do Camiño Inglés por parte da Xunta e da Deputación da Coruña. Xa pasaron máis de cinco anos e medio dende que o Concello de Oroso, en novembro de 2009, aprobara por unanimidade ceder unha parcela ao Xacobeo para a construción dun albergue de peregrinos no que a Xunta presidida polo socialista Emilio Pérez Touriño comprometera un investimento de 450.000 euros.

Un dos moitos incumprimentos do PP con Oroso e os seus veciños que, desta vez, tamén prexudica aos máis de 3.500 peregrinos que percorren cada ano o Camiño Inglés. Unha cifra que non deixa de medrar. Ante esta situación, os Socialistas de Oroso apoiamos a postura adoptada polo compañeiro Manuel Mirás de non seguir cedendo o polideportivo, pois iso prexudica aos nosos veciños. En primeiro lugar, porque verían reducido a disponibilidade destas instalacións, tanto a primeira como a última hora do día. En segundo lugar, porque a continuada pernoctación de peregrinos causa desperfectos nas instalacións. E en terceiro lugar, porque esta situación prexudica aos veciños e veciñas que utilizan os polideportivo e que, por exemplo, non teñen acceso á auga quente durante as primeiras horas da mañá.

Os Socialistas de Oroso consideramos que xa é hora de que a Xunta do PP cumpra cos seus compromisos e faga ese albergue que leva atrasando dende hai máis de cinco anos e medio. Ademais, presentamos unha moción plenaria para que a Xunta e a Deputación da Coruña se impliquen na potenciación da promoción turística e económica do Camiño Inglés. O compañeiro Antonio Leira, encargado de defender esta proposta tanto en Oroso como ante a Institución Provincial, pedíu en especial a implicación da Deputación “porque o Camiño Inglés é o único que discorre integramente pola provincia”. Neste sentido, os Socialistas de Oroso consideramos que a Deputación coruñesa debería tomar exemplo da Deputación de Lugo, presidida polo socialista José Ramón Gómez Besteiro, quen se puxo á cabeza da promoción do Camiño. Ou mesmo que tome exemplo da Deputación de Pontevedra, gobernada tamén polo PP.

Como era de agardar, a moción contou co apoio de todos os grupos municipais coa excepción do Partido Popular. Unha vez máis, e non será a última, o señor Balado e compañía volveron a esquencer os intereses dos veciños e veciñas de Oroso para asumir docilmente as instrucións que chegan dende O Hórreo, non vaia ser que se enfaden os xefes. E en certo xeito non deixa de ser lóxico, pois o señor Balado non vai a criticar ao seu xefe na Deputación, non vaia ser que quede sen choio. En lugar diso, repetiron o mantra aznariano de “España va bien”, aínda que a Deputación nin sequera chegase a indicar un folleto turístico sobre o Camiño Inglés que recolla información como, por exemplo, que en Sigüeiro non hai albergue.

 

Deixa un comentario